कृषि तथा पशुपन्छी विकासमन्त्री रामनाथ अधिकारीले नेपाली चियाले विश्व बजारमा दरिलो उपस्थिति देखाउन सकेको बताएका छन्।
२९ औं राष्ट्रिय चिया दिवसका अवसरमा राष्ट्रिय चिया तथा कफी विकास बोर्डले आज ललितपुरमा गरेको कार्यक्रमलाई सम्बोधन गर्दै मन्त्री अधिकारीले विभिन्न चुनौतीहरूका बीच पनि नेपाली चिया प्रमुख निर्यातजन्य बालीका रुपमा रहेको बताए। उनले कृषक, मजदुर, उद्योगी व्यवसायी, सहकारी र सरकारको सामूहिक प्रयासबाट सम्भव भएको बताएका छन्।
मुलुकको व्यापार घाटा चुलिँदो अवस्थामा चियामा आत्मनिर्भर मात्रै नभई भारतसहित तेस्रो मुलुकमा समेत निर्यात हुँदै आएकाले नेपाली चियामा अपार सम्भावना रहेको उल्लेख गरे।
आगामी दिनमा यी चुनौतीहरूको समाधान निकाल्दै चियाको गुणस्तरीय वृद्धि र दीर्घकालीन बजारको समस्या समाधानका लागि रणनीतिक योजनाका साथ अधि बढ्न मन्त्री अधिकारीले बोर्डलाई निर्देशन दिए। मन्त्री अधिकारीले चिया क्षेत्रको समग्र नेतृत्व गरिरहेको बोर्डलाई श्रोत साधन सम्पन्न बनाई नीतिगत समस्याहरूलाई फुकाउन मन्त्रालय तयार रहेको उनको भनाइ छ।
