साताको दोस्रो कारोबार दिन नेपाल स्टक एक्सचेञ्च (नेप्से) मा दोहोरो अंकको बृद्धि आएको छ ।
आज नेप्से परिसूचक ४०.७६ अंकले बढेर २ हजार ७९६.३८ विन्दुमा पुगेको छ । आज बलिया र राम्रा कम्पनीको मापक सेन्सेटिभ इन्डेक्स भने ०.१९ प्रतिशतले घटेर ४९१.७८ विन्दुमा पुगेको छ । यो दिन नेप्सेमा सूचीकृत मध्ये ३२६ वटा स्क्रिप्टको ४ करोड ९६ लाख ६६ हजार ७६१ कित्ता सेयर २१ अर्ब ८१ करोड २२ लाख रुपैयाँभन्दा बढीको कारोबार भएको छ ।
सोमबार कारोबारमा आएका १३ उपसमूहमा ७ उपसमूहको सूचक सकारात्मक देखिएको छ भने ५ उपमूहको सूचक नकारात्मक देखिएको छ। यस दिन होटल उपसमूहको सूचक ६.६९ प्रतिशतले बढेको छ भने अन्य उपसमूह र कारोबार उपसमूहको सूचक ५ प्रतिशतभन्दा धेरैले बढेको छ। यता फाइनान्स उपसमूहको सूचक सबैभन्दा धेरै ४.६१ प्रतिशतले घटेको छ।
आज रुरु जलविद्युत, सिइडिबि हाइड्रोपावर डेभलपमेन्ट, सगरमाथा जलविद्युत लगायतका ८ कम्पनीको शेयरमूल्य १० प्रतिशतले बढेको छ भने ५ कम्पनीको शेयरमूल्य ९ प्रतिशतभन्दा धेरैले बढेको छ।
यस्तै नेपाल फाइनान्सको शेयरमूल्य सबैभन्दा धेरै १० प्रतिशतले घट्दा हिमालयन लघुवित्तको ७.६२ प्रतिशत, गुह्वेश्वरी फाइनान्सको ६.२६ प्रतिशतले घटेको छ।
आज हिमालयन रि इन्स्योरेन्सको १ अर्ब २६ करोड रुपैयाँको शेयर कारोबार भएको छ भने एनआरएन इन्फ्रास्टक्चर एण्ड डेभलपमेन्ट कम्पनीको ४९ करोड र सानिमा हाइड्रोपावरको ४४ करोड रुपैयाँको शेयर कारोबार भएको छ।
