नेगी बस्तीमा ४७ धुरी र एक आधारभूत विद्यालय रहेको छ । उक्त बस्तीभन्दा ५ सय मिटरमाथि ‘पल्सङ’ नाम गरेको विशाल ढुंगा बस्तीमा खस्ने अवस्थामा थियो । ढुंगा खसेपछि विद्यालय र स्थानीय बासिन्दालाई क्षति पुऱ्याउने भएपछि गएको वर्ष जिल्ला विपद् व्यवस्थापन समितिलाई स्थानीयवासी र गाउँपालिकाले हटाइदिन अनुरोध गरेका थिए । उक्त ढुंगा ०७२ साल वैशाख १२ र २९ गते आएको महाभूकम्पले डगमगाएको थियो । घरमाथि ढुंगा खसेर झर्ने त्रास हटेको स्थानीय लालबहादुर तामाङले बताए ।

यसअघि वर्षाको समयमा ढुंगो खस्ने डरले गाउँपालिकाले स्थानीयलाई सुरक्षित् स्थानमा राखेको थियो । पल्सङ ढुंगा फुटाउनका संघीय सरकार, प्रदेश सरकार र दुप्चेश्वर गाउँपालिकाले खर्च बेहोरेका थिए ।

हेलिकोप्टरमार्फत एयर कम्प्रेसरलगायतका विभिन्न उपकरण तथा सामग्री ढुवानी गरेर फुटाएको सेनाले जनाएको छ । पल्सङ ढुंगा फुटाइसकेपछि दुप्चेश्वर गाउँपालिकाले समापन कार्यक्रम राखेको थियो ।